اتنين بيستخدموا نفس الموديل ، و نفس الأدوات ، و نفس الاشتراك المدفوع مخرج الأول شغل تقدر تبني عليه قرار ، و مخرج التاني كلام مرتب مالوش لازمة و الفرق بينهم مش في البرومبت
دي أكتر حاجة اتغيرت في فهمي للموضوع ده كنا كلنا فاكرين إن المهارة هي إنك تعرف تكتب طلب كويس و اللي بأشوفه دلوقتي إن كتابة الطلب هي آخر عشرة في المية من الشغل التسعين في المية اللي قبلها حاجة تانية خالص ، و لسه مالهاش اسم متداول بالعربي أقرب توصيف ليها إنه عقل مدبر ، الـorchestrator الشخص اللي بيقرر السؤال ، و بيجهّز المدخلات ، و بيرتّب الخطوات ، و بيحط نقطة تحقق بعد كل خطوة.
خليني أفكك الأربع حاجات دول واحدة واحدة
الأولانية إنه بيقرر السؤال و دي أصعبهم و أقلهم كلام عنها الموديل شاطر جداً في إنه يجاوب ، و هو مش بيقرر إذا كان السؤال أصلاً يستاهل فلو انت سألت سؤال غلط ، هتاخد إجابة ممتازة على سؤال غلط و دي أخطر حالة ممكن تحصل ، لأن الإجابة هتبقى مقنعة و انت هتمشي وراها معظم الشغل اللي شفته بيضيع مش في التنفيذ ، بيضيع في إن حد سأل سؤال مش هو ده السؤال.
التانية إنه بيجهّز المدخلات الموديل بيجاوب من اللي انت مديهوله ، مش من الواقع لو المصطلح الواحد عندك متعرّف بتلات طرق مختلفة ، هيجاوبك بتلات طرق مختلفة و كلها هتبان صح و هنا الحتة اللي بتخدع الناس لأن الفوضى لما بتتكتب بلغة سليمة و منظمة ، بتتحول لحاجة شكلها موثوق مافيش رسالة خطأ ، و مافيش حاجة بتقف الشغل بيكمل عادي و انت مبسوط ، و المشكلة بتظهر بعد كام أسبوع لما تلاقي قرار اتاخد على أساس غلط النظام لما بيقع بيقع بصوت ، و الشغل ده بيقع من غير صوت.
التالتة إنه بيرتّب الخطوات مافيش مهمة حقيقية بتتحل في طلب واحد الشغل الجاد بيتقسّم ، خطوة بتجمّع ، خطوة بتنضّف ، خطوة بتحلل ، خطوة بتراجع و الترتيب ده هو اللي بيحدد الجودة أكتر من أي حاجة تانية اللي بيحصل عند أغلب الناس إنهم بيحاولوا يحشروا كل ده في طلب واحد طويل ، و بعدين يقولوا الموديل ضعيف الموديل مش ضعيف ، انت طلبت منه يعمل خمس شغلانات في نفس اللحظة و ما قلتلوش ترتيبهم.
الرابعة و أهمها إنه بيحط نقطة تحقق يعني بعد كل خطوة ، في حاجة بتتشاف بعين إنسان قبل ما تتحرك للخطوة اللي بعدها مش مراجعة كل حاجة ، دي مستحيلة و مش عملية المقصود عيّنة ثابتة ، في وقت ثابت ، بيعملها حد اسمه مكتوب الفكرة إن كل مخرج يبقى له صاحب من البني آدمين مش اللي كتب الطلب ، اللي بيتحمل نتيجة المخرج ده الشغل اللي مالوش صاحب ما بيقفش ، بيفضل ماشي و بيتدهور بالتدريج و محدش واخد باله.
في حتة أخيرة و هي أهم حاجة في الموضوع كله العقل المدبر ده مش دور تقني انت مش محتاج تكون بتكتب كود ، و مش محتاج تعرف أسماء الأدوات كلها انت محتاج تكون فاهم الشغل نفسه فهم عميق لأن قرار السؤال الصح ، و تعريف المدخلات ، و ترتيب الخطوات ، دي كلها قرارات في المجال مش في التكنولوجيا اللي مش فاهم شغله كويس مش هيقدر يبني ورك فلو صح مهما كانت أدواته حلوة و دي في رأيي أحسن خبر لأي حد بيشتغل بجد من سنين الخبرة اللي كنا فاكرين إن الـAI هيلغيها ، هي بالظبط اللي بتخليك تعرف تستخدمه.
و في حاجة كمان بأشوفها بتحصل إن الناس بتتكلم عن الأدوات كأنها هي الميزة و الأدوات دي بتتغير كل شهر ، و بتبقى متاحة للكل في نفس اليوم الميزة الحقيقية هي إن يكون عندك حد فاهم شغله ، و قادر يترجم الفهم ده لخطوات مكتوبة يقدر غيره يمشي عليها دي حاجة ما بتتنسخش بسهولة ، و ما بتتلغيش مع كل إصدار جديد